Азнакайда җылылык сезоны ачыла

Әлеге уңайдан район башкарма комитеты җитәкчесе Айдар Шәмсетдинов халыкка һәм предприятие-оешма җитәкчеләренә мөрәҗәгать белән чыкты.

– Ресурслар белән тәэмин итүче оешмалар җылылык сезонына әзер. Насослар эшләп китеп, җылылык кулланучыларга барып җиткәнче берничә көн узарга мөмкин. Монда җылылык челтәрләреннән су агып, авария очракларын да искә алырга кирәк. Шуңа күрә оешмалар җитәкчеләренә шушы ике-өч көн эчендә игътибарлы булырга, су басу очраклары булмасын өчен дежур торуны оештырырга тәкъдим итәм. Бу көннәрдә фатирлардагы һәм подъезд эчләрендәге җылыту радиаторларының торышына да аеруча игътибарлы булу сорала.

Югары катта яшәүчеләргә вакытында җылылык радиаторларыннан һаваны чыгару да кирәк. Каядыр озакка яки еракка киткәндә, моны истә тотсагыз иде, чөнки бер кеше аркасында бөтен подъезд җылысыз утырырга мөмкин.

Киләсе атнада  җылылык булмаса, күп фатирлы торак йортларда яшәүчеләр – үзләренең идарәче компаниясенә, предприятие оешмалар җылылык челтәре предприятиесенең авария хезмәтенә мөрәҗәгать итә ала.

Су агу очраклары булганда 9-38-69 телефоны буенча авария хезмәтенә шалтыратыгыз.

Җылылык сезоны аварияләрсез, шома башланыр дигән өметтә калабыз.