Азнакайда депутат Рөстәм Мөхәммәдиев мөмкинлекләре чикле балаларга бүләкләр тапшырды

Анда ике һәм аннан күбрәк инвалид бала тәрбияләнүче гаиләләр чакырулы иде.

– Монда барыбызга үрнәк булырдай балалар, гаиләләр җыелган. Бүген мин рәхмәтнең аеруча зурысын әти-әниләргә җиткерәм. Авыруларга карамастан, бирешмичә, сынаулар алдында сыгылмыйча, балаларга бар йөрәк җылыгызны биреп, аларны шундый көчле рухлы итеп тәрбияләвегез өчен рәхмәт, – диде депутат.

Муниципаль район башлыгы Марсель Шәйдуллин азнакайлыларга һәрдаим ярдәме өчен Рөстәм Мөхәммәдиевка тирән рәхмәтен белдерде.

Балалар җитәкчеләрне шигырьләр сөйләп куандырдылар. Тантанада бирегә чакырылган 22 баланың әти-әнисе дә катнашты. Алар үзләренә, гаиләләренә булган мондый игътибар өчен рәхмәт әйтеп туя алмадылар.

– Һәрчак безнең хәлебезгә кереп, балаларыбызны зурлаган өчен мең рәхмәт. Сәламәтлектә, бәхеттә яшәргә язсын, – диде барлык әти-әниләр исеменнән Әлфия Шәйдуллина. Ул бүген үз гаиләсенә 15 ятимне сыендырган.