Азнакай укучылары игелекле эшләр кыла

Аның бер юнәлеше булып волонтерлар эше – игелеклеләр хәрәкәте тора.

– Алар элеккеге тимурчыларны хәтерләтә, балаларда мәрхәмәтлелек, дуслык хисләре тәрбияли. Бер-беребезгә изге гамәлләр, яхшы эшләр белән ярдәм күрсәтү көндәлек тормышыбыздан һич тә читләшмәсен иде. Игелек дигән төшенчә эштә генә түгел, ул безнең уебызда да, фикеребездә дә, күңелебездә дә яшәргә тиеш. Бигрәк тә яшь буында кешелеклелек, шәфкатьлелек сыйфатлары тәрбияләү – безнең төп бурычыбыз, – ди мәктәп директоры Гаяз Хәмидуллин.

Безнең мәктәп Актүбәдәге картлар һәм инвалидлар интернат-йорты белән үзара килешү төзеде. Игелек хәрәкәтендә катнашучы укучылар өлкәннәр декадасы уңаенан түгәрәк  җитәкчесе Рәйсә Низамова  белән анда үз куллары белән эшләгән  күчтәнәчләр   белән бардылар.   Укучылар  белән очрашу  өлкәннәр күңеленә хуш килде. Алар  рәхмәт әйтеп, уңышлар теләп калдылар.

Рузилә Низамова, уку эшләре буенча директор урынбасары