Актүбә бистәсендә Бөтенроссия китапханәчеләр конкурсында җиңүчеләрне галим һәм язучы Мариэтта Чудакова тәбрикләде

Актүбә бистәсе 2 нче урта мәктәбендә тарихи мирасны өйрәнү Фонды һәм Егор Гайдар Фонды оештырган "Гайдар чоры" Бөтенроссия китапханәчеләр конкурсында катнашкан райондашларыбызга кызыксындыру премияләре тапшырылды.

Җиңүчеләрне - мәктәп китапханәчесе Рәмилә Хөснуллина һәм 2013 елгы чыгарылыш укучысы, хәзер КФУ студенты Ришат Зариповны Европа академиясе әгъзасы, М.Горький исемендәге әдәби институт профессоры, җәмәгать эшлеклесе һәм язучы Мариэтта Чудакова тәбрикләде.

Ул укучылар, укытучылар һәм район китапханәчеләре белән очрашуында китап укуның рухи тәрбия бирүдә зур роль уйнавы хакында сөйләде, яңа чыккан әдәби китаплар белән таныштырды һәм мәктәпләргә үз әсәрләре белән бергә 90 нчы еллар тарихы турында китаплар бүләк итте.

Наиля Садриева, рус теле һәм әдәбияты укытучысы