1 апрельдән беренче сыйныфка гаризалар кабул ителә башлый.

Моның өчен ТР электрон мәгарифе адресына (edu.tatar.ru) кереп, үзең теләгән мәктәпне табарга һәм "Мәктәпкә кабул итү" дигән язуны ачып, балагызны беренче сыйныфка кабул итүләрен сорап язган гариза калдырырга кирәк. Гаризаларны шулай ук кәгазь формада да бирергә була. Ә менә документлар бары шәхсән тапшырыла.

Бүгенге көндә беренче сыйныфка кабул итүдә яңа кагыйдәләр бар. 1 марттан 31 июльгә кадәр мәктәпкә иң беренче чиратта ул урнашкан микрорайонда яшәүчеләрнең балалары кабул ителә. 1 августтан 5 сентябрьгә кадәр буш калган урыннарга башка микрорайон балаларын кабул итәчәкләр. Алар шулай ук категорияләргә бүленә.

Дәүләт һәм муниципаль гомүмбелем бирү учреждениеләренә беренче сыйныфка балаларны, әзерлеген тикшереп, конкурс нигезендә кабул итү тыела.

Качаклар яки күченеп килүчеләрнең балалары ата-аналарның паспортындагы язу нигезендә, чынбарлыктагы яшәү урынын күрсәтеп, гариза буенча кабул ителәләр.