Азнакайда 17 меңнән артык сайлаучы тавыш биргән (ФОТО+ВИДЕО)

12.00 сәгатькә тавыш бирү хокукы булган 49241 азнакайлының 17026 сы үз тавышын биргән. Бу шәһәрдәгеләрнең – 29,5, авыл җирлегендә яшәүчеләрнең 41,9 проценты дигән сүз.

Буралы авылында 254 сайлаучы яши. Нурислам Минһаҗев – КФУ студенты. Сайлауларда әле беренче генә катнаша.

– Минем өчен бүген бик сөенечле, шул ук вакытта дулкынландыргыч көн. Кандидатлар турында башта ук хәбәрдар булсам да, сайлау участогына килгәч, анда урнаштырылган мәгълүматлар белән тагын бер кат танышып чыктым һәм үз тавышымны якты киләчәк өчен бирдем, – ди Нурислам.

Азнакай муниципаль район территориясендә – 42, шәһәрдә 20 участок сайлау комиссиясе эшли. ТР Дәүләт Советындагы 100 депутатлык мандатына 8 сәяси партиядән һәм үз-үзләрен күрсәткән 430 кандидат дәгъва кыла.

Барлык сайлау участокларында да кандидатларның һәм партияләрнең ышанычлы вәкилләре, күзәтүчеләр, хокук сакчылары, янгын сүндерү бүлеге хезмәткәрләре кизү тора.