Азнакай балалар китапханәсендә иҗади очрашу узды

Безнең район балалар китапханәсендә «Гөлстан» әдәби берләшмәсе әгъзасы, «Татарстан яшьләре» газетасы корреспонденты Марат Исхаков һәм Азнакай шәһәренең 1 нче номерлы мәктәбенең 8 «В» сыйныфы укучылары катнашында «Журналист һөнәре серләре» дип исемләнгән түгәрәк өстәл узды.

Чара барышында Марат Исхаковның корреспондент буларак иҗат юлына күзәтү ясалды. Түгәрәк өстәл аның кызыклы хикәяләре һәм укучыларның кызыклы сораулары белән үрелеп барды. Кечкенәләр абонементы китапханәчесе Римма Исхакова авторның «Безнең дә булды балачак...» дигән, мәктәп хәтирәләре буенча язылган хикәяләр җыентыгы белән таныштырды, чәчмә әсәрләренән өзекләр укыды. Шулай ук, уку залы китапханәчесе Алсу Сәйфиева укучыларны Марат Исхаковның «Татарстан яшьләре» газетасында бастырылган берничә мәкаләсе белән таныштырды.

Әлеге чара ахырында Марат Исхаков укучыларга үзенең ихлас теләкләрен җиткерде, киләчәк һөнәрләре итеп журналист һөнәрен сайлаучыларга үзенең киңәшләрен бирде.

Римма Исхакова , район балалар китапханәсе