Азнакайның 2-нче урта мәктәбендә «Каз өмәсе» милли йолалар, уен-көлке, мастер-класслар белән онытылмаслык булып утте (ФОТО+ВИДЕО)

Гульнара ХАФИЗОВА, 17 декабрь 2019 - 10:59

1159

Яшь буын милли йолаларыбызны белә, аңлыймы? Татар мохитенең киләчәге бармы? Жомга көнне шәһәребезнең 2-нче урта мәктәбендә үткән «Каз өмәсе» чарасы бу сорауларда икеләнүләргә урын калдырмады.

Азнакайның 2-нче урта мәктәбендә «Каз өмәсе» милли йолалар, уен-көлке, мастер-класслар белән онытылмаслык булып утте (ФОТО+ВИДЕО)

Үсеп килүче егет-кызларның чиста татар телендә җырлауларын, табышмаклар, шаян сүзләр әйтешүләрен, күз иярмәслек биюләрен тамаша кылган район һәм шәһәр мәктәпләреннән җыелган татар теле укытучылары, ветераннар, әти-әниләр алар өчен чын горурлык кичерделәр. Мәктәп директоры Лена Гыйззәтуллина, килгән кунакларны сәламләп, мондый чараларның татар телен, буыннар бәйләнешен саклауда әһәмиятен ассызыклап үтте.

Әлбәттә, балаларның туган телгә, мәдәнияткә хөрмәте укытучылардан килә. Ә алар кунакларны янә сокландырдылар: татлы урама пешерү, сәйлән беләзек тезү, яулык бәйләү, брошка, кәгазь салфеткалардан чәчәкләр ясау буенча берничә мәйданчыкта оештырылган мастер-классларда үз осталыклары серләренә төшендерделәр. Хезмәт укытучысы Риф Хаҗиевның каз мамыгын җыярга да, кышкы аяк киемнәрен кардан чистартырга да файдалы булган пумала ясау күнекмәләренең дә һәр йортта кирәге чыгар.

Милли ризыклар белән бизәлгән мул чәй табыны артында тәмамланган бәйрәмдә кунаклар фикер алышып, оештыручыларга рәхмәтләрен җиткерделәр. Милли тәрбия бенча директор урынбасары Фәридә Мөхлисова бу бәйрәмне оештыру бер яктан зур җаваплылык булса, икенче яктан, балалар һәм укытучыларга онытылмас кичерешләр, милли үзаң тәрбияләүдә тәҗрибә мәктәбе булуын әйтте.