Азнакай умартачылары семинары узды

Семинарда район Советы аппараты җитәкчесе Айдар Хәлиуллин һәм авыл хуҗалыгы һәм азык-төлек идарәсе җитәкчесе Рамиль Исламов та катнаштылар.

- Азнакай – республикада иң күп умарта тотучы районнарның берсе. Районыбызда узган көздә 426 хуҗалыкта 7857 баш умарта исәпләнде. Иң күп умарта тотучылар Актүбә бистәсендә, Карамалы, Тымытык, Чемодур авыл җирлекләрендә. Шулар арасында 155 хуҗалык 20дән артык баш умарта асрый. Бүгенге көндә 468 хуҗалыкның 328ендә паспорт бар. Узган ел 810 тонна сату балы җитештерелде, 200 баш умарта һәм бал корты пакетлары сатылды, – диде Айдар Хәлиуллин.

Очрашу барышында алдынгы ике умартачыны да бүләкләделәр. Азнакай ветеринария лабораториясе директоры Марсель Зарипов умарталарга паспорт ясату мөһимлеген аңлатты, умартачылыкта цифрлаштыру һәм бал корты пакетларын сату хакында сөйләде. «Союз-Агро», «Азнакай» агрофирмасы, «Август-Мөслим» җәмгыятьләре хезмәткәрләре чәчүлектә бал бирә торган культуралар, басуларны агулау тәртибе турында чыгыш ясадылар. Һәвәскәр умартачы Фәнис Йосыпов умартачылыкта инфекцияле һәм инвазив чирләргә каршы заманча препаратлар турында сөйләде, аларны ничек нәтиҗәле итеп кулланырга, чирләргә каршы нихәтле көчле булуларын аңлатты. Һәр чыгыш ясаучы умартачыларны борчыган сорауларга тәфсилләп җавап бирде.

Тулырак «Маяк» газетасында укый аласыз.