Йолаларга бездә урын киң

Быелгы пандемия аның да киңлекләрен бераз чикләде, шуңа да ул видеобәйге рәвешен алды. Әмма иҗади фантазиягә чикләр бармы соң! Мәдәният хезмәткәрләре, үзешчәннәребезнең сәләтенә сокланмый мөмкин түгел. Аларның иҗаты бай эчтәлекле кинофильмнар, видеосюжетлар, затлы күргәзмәләрдә чагылды. Татшуганлыларның “Каз өмәсе”н аласыңмы, Якты Күл авылы үзешчәннәренең “Бала юындыру” йоласынмы, туйкәлеләрнең “Каен бәйрәме”н, урсайлыларның “Сөмбелә”сен, Уразай һәм Сәпәй авылы мәдәният йортларының “Кыз урлау” маҗарасынмы... – борынгыдан килгән халык җәүһәрләрен нинди генә матур нәкышләргә төрмәгән алар! Нәкъ менә әби- бабаларыбыз кебек милли көйләр, уеннар белән һәркайсын чын мәгънәсендә олы бәйрәмгә әверелдергәннәр. Авылларыбызда гореф-гадәтләрнең бүгенге көнгәчә сакланып, аңа яңа бизәкләр өстәлеп торуы куандыра.

Сүз дә юк, жюрига бу эшчәнлекне бәяләп, иң-иңнәрне сайлап алу җиңелдән булмагандыр. Шулай итеп, беренче урынны мәдәни эшчәнлектә һәрчак яңалыклар кертергә омтылган Үчәлле, Уразай, Татшуган авыллары мәдәният йортлары алды. Икенче урында – шулай ук иҗади ялкынлы Сәпәй, Чалпы, Ирекленең фольклор коллективлары. Өченче урын йолаларны барлауда тирәнтен эзләнгән Мөслим, Әгерҗе, Благодатное авыллары мәдәният учакларында. Башка берничә төр номинацияләр җиңүчеләре, бәйгедә актив катнашкан коллективлар һәм үзешчәннәр дә Диплом-бүләкләргә лаек булды.