Газетага багышланган гомер: матбугат ветераны Габидә Җиһаншина юбилеен каршылый

Ул 1965 елда эшкә килгәндә “Маяк” газетасы редакциясе Комсомол ура­мындагы баракта урнашкан була әле. Менә шуннан алып 2017 елга кадәр Габидә апа хезмәт вахтасын­да. Меңләгән битләрне укып, һәр хәрефкә, һәр тыныш билгесенә кадәр тикшерү зур түземлек таләп итә. Әмма Габидә Җиһаншина үз эшен җиренә җиткереп, зур җаваплылык белән башкара. Гомере буена телебезнең сафлыгы, дөреслеге өчен көрәшә ул. Аның фидакарь хезмәте нәтиҗәсендә меңләгән укучыла­рыбыз саф, дөрес телдә язылган га­зетабызны укып килде. Чыннан да, Габидә апа укыган газеталардан хата табу мөмкин дә түгел. Әле моннан кала Габидә апа районыбыз, авыл­лар тарихын чагылдырган һәм баш­ка бик күп китап, язмаларның кор­ректоры булып торды. Кыскасы, корректор – аның гомерлеккә сай­лаган хезмәте булды. Моннан кала, Габидә Җиһаншина кирәк чагында хатлар бүлегендә әдәби хезмәткәр булсынмы, башка урындамы – хезмәткәрләрне алыштырды.

Хезмәттәшебезнең озак ел­лар фидакарь хезмәте лаеклы бәяләнде. Ул КПСС һәм ВЛКСМ өлкә комитетларының, ТР Минис­трлар Кабинетының, Мәдәният министрлыгының, “ТАТМЕДИА”ның, район һәм шәһәр хакимиятенең, редакциянең Мактау грамоталары, Рәхмәт хатлары белән бүләкләнде. Ленинның 100 еллыгы уңаеннан юби­лей медаленә лаек булды, Хезмәт ве­тераны исемен йөртә.

Габидә апа алыштыргысыз кор­ректор булу өстенә яшьләрнең оста­зы да булып торды. Һәрвакытта да ярдәм кулын сузарга әзер торучы, киңәшчебез дә, сердәшчебез дә бул­ды ул безнең.

Габидә Сәетовнаның бер генә килмәгән җире дә юк. Уңган хуҗабикә дә әле ул. Аның пешергән ризыкла­ры телеңне йотарлык була. Уңган- булган әти-әнинең балалары да үзенә охшаган була инде аның. Улы Булат Җиһаншин – татар эстрадасы җырчысы, композитор, киноактер бу­ларак та билгеле шәхес. Яшьләрне туган телгә җәлеп итү өчен хәзерге заманча аранжировкалар өстендә эшли. Кызы – Гөлназ да үзешчән композитор, педагог, балалар бак­чалары өчен җырлар яза. Әнә шу­лай балаларының, оныкларының уңышларына куанып, оныклар үстерешеп, якыннары янәшәсендә тулы канлы, матур тормышта яши Габидә апа. Ул – дүрт оныгының ярат­кан әбисе дә.

Юбилеегыз белән, Габидә Сәетовна! Сезгә ныклы сәламәтлек. гаиләгездә иминлек, якыннарыгыз янәшәсендә куанычлы озын гомер телибез. Яратабыз, хөрмәт итәбез!

“Маяк” газетасы редакциясе коллективы, ветераннар советы