Монолит микрорайонында Күршеләр көнен бәйрәм иттеләр

Ниндидер йомышың килеп чыкса да, ярдәм сорап иң элек күршеңнең ишеген кагасың. Әби-бабайларыбыз да юкка гына “Күрше хакы – тәңре хакы” димәгән. Монолит микрорайонында яшәүчеләр дә шулай бер-берсенең хәлен белеп, аралашып, тату гомер кичерәләр.

Кичә алар балалар мәйданчыгында узган Күршеләр бәйрәменә җыелды.

– Күршеләр – иң якын кешеләр дим мин үзем. Кая гына китсәк тә, йортка, ихатага күз-колак булып торучылар да, кайгы-шатлыкларны иң беренчеләрдән булып уртаклашучылар алар. Микрорайоныбызда ел әйләнә төзелеш бара, ел саен дистәләгән яңа йортлар калка. Яшьләребез дә шулай күрше-тирә белән аралашып, матур итеп яшиләр, – ди 4 нче территориаль иҗтимагый үзидарә рәисе Нурия Хаҗипова.

Шәһәрнең Мәдәни үзәк коллективы һәм ТОС рәисе белән берлектә уздырылган Күршеләр көнендә өлкәннәр белән бергә балалар да бик актив катнаштылар.  Концерт номерлары карап, бергәләп уеннарда уйнап, күңелле узды бәйрәм. Күршеләр көне соңыннан сый-нигъмәтле өстәлләр артында дәвам итте.