Азнакаево
  • Рус Тат
  • Бәйге җиңүчесе – Данил Гыйльманов

    ​​​​​​​Укытучыларның һөнәри бәйрәме уңаеннан “Маяк” газетасы үзенең aznakaevo-rt.ru сайтында “Минем сөекле укытучым” дигән фотобәйге игълан иткән иде.

    Фотосүрәтләр 29 сентябрьгә кадәр кабул ителде. 30 сентябрьдән 5 октябрьгә кадәр тавыш бирү үткәрелде.

    Иң күп тавыш җыеп, әлеге бәйгедә Азнакай 1 нче урта мәктәбенең 1 нче сыйныф укучысы Данил Гыйльманов җиңеп чыкты. Ул укытучысы Ракия Фанисовна фотосүрәтен җибәргән иде.

    – Шулкадәр тавыш җыйгач, дусларың күптер. Тырышып укы, алга таба да безнең бәйгеләрдә катнашырсың дип ышанам, – диде “Маяк” газетасы баш мөхәррире Фәрхәт Шәйхулов аңа вәгъдә ителгән бүләк – “Дельфин” бассейнына бер айлык абонемент һәм диплом тапшырганда.

    Данил бик сәләтле малай: өч яшендә укырга өйрәнгән, дүрт яшеннән инглиз теле белән шөгыльләнә.

    – Музыка мәктәбендә җырларга, баянда уйнарга өйрәнәбез, шәһәрдәге бөтен түгәрәкләргә йөрибез. Кышын чаңгыда, тимерякта шуабыз. Кирәк икән тегә дә, чигә дә ала. Бала һәр эшне, һөнәрне аз-азлап булса да белергә тиеш дип уйлыйбыз, – ди әнисе Гөлназ Гыйльманова.

    Ә Данилның мәктәптә иң яраткан фәне – физкультура. Шулай булмыйча соң, бу кадәр түгәрәкләргә физик әзерлексез ничек өлгермәк кирәк!

    Нравится
    Поделиться:
    Реклама
    Комментарии (0)
    Осталось символов: