Азнакайда СВОда катнашучыларның гаиләләре белән очрашу

Шәһәрнең мәдәни үзәгендә үткәрелгән түгәрәк өстәл сөйләшүендә район башкарма комитеты җитәкчесенең социаль мәсьәләләр буенча урынбасары Дамир Гыйләҗев, районның хатын-кызлар оешмасы җитәкчесе Эльвира Галиева, мәдәният идарәсе начальнигы Гөлсинә Хафизова да катнашты.

Хәзерге көндә 600гә якын якташыбыз Ватаныбыз данын яклап, туган җирләреннән, туган йортларыннан еракта махсус хәрби хәрәкәтләрдә көч куялар. Өйдә аларны якыннары көтә, әти- әниләре, тормыш иптәшләре, балалары көтә. Резеда Хәмидуллина — биш бала әнисе,

«Ана даны» медале иясе; тормыш иптәше дә, улы да махсус хәрби операция зонасында. «Без аларны бик сагынабыз, бик көтәбез. Тизрәк җиңү белән исән-сау кайтсыннар», - ди әни кеше. 

Альбина Җәләеваның ире Айнур СВОга 2022нче елның 28нче октябрендә мобилизация белән киткән. Мәдәни үзәктә оештырылган чарага әнисенә ияреп кызлары Самирә да килгән иде.

«Әтием минем белән горурлансын дип, 5ле билгеләренә генә укыйм», - ди кызчык. Нәфисә апа Вагыйзовның улы Ринат шулай ук, 2022нче елдан бирле сугышта. «Инде октябрьдә өч ел була. Болай сөйләшеп торабыз, көнгә икешәр тапкыр элемтәгә чыга». — Ана улының бик әдәпле, хезмәт сөючән булуын да билгеләп үтте. 

Якыннарының әйтүенә караганда, районыбыздан бөтен халык бердәм булып, күмәк җыеп җибәргән гуманитар ярдәм үз вакытында хәрбиләргә барып ирешә. Сүз уңаеннан, Азнакай районынан махсус хәрби операция зонасына барлыгы 445 тонна гуманитар ярдәм озатылган, гомуми сумма якынча 175 миллион сумны тәшкил итә (шул исәптә 19 берәмлек техника). 

Шунысы аяныч: түгәрәк өстәл артында ватанпәрвәрлек хисе белән хәрби бурычын үтәргә киткән якыннарын югалткан ханымнар да бар. Алсу Мөхәммәтҗанованың ире Руслан 2024нче елның 30нчы июлендә һәлак булган. Өч кыз бала әти назыннан мәхрүм кала. Олы кызлары Айсылу 11нче сыйныфта, Таңсылу 8нчедә, ә кече кызлары Гөлсылуга әле нибары 3 кенә яшь.

«Сәламәтлеге аркасында Руслан Армия хезмәтеннән мәхрүм калган. Хәрби хезмәт — аның хыялы иде. Кечкенәдән патриотик хисләр белән үскән ул, илне саклыйм, кызларыма да ярдәм итәсем килә, дип киткән иде», - Алсу ханым күз яшьләрен тыя алмыйча, кадерлесен искә алды.

Очрашу чәй табыны артында җылы атмосферада узды. Җитәкчеләр тарафыннан батыр егетләрнең якыннарына рәхмәт сүзләре әйтелде.

«Монда катнашучы хатын-кызларыбыз үзләре үк волонтерлар сафына кушылып, ярдәм җыюда күп көчләрен куялар», - ди районның Хатын-кызлар иҗтимагый оешмасы җитәкчесе Эльвира Галиева.

Ихлас сөйләшүдә «Болгар радиосы» алып баручысы, журналист Дилбәр Фәиз дә бар иде. Ул катнашучыларның һәрберсе белән аерым аралашты. 

Вакыт алга атлый, җиһаныбызга кабаттан җылы язлар килә. Быелгы яз илебезгә Җиңү алып килсен, ир — егетләребез үз гаиләләренә исән- имин әйләнеп кайтсыннар.