Азнакаево
  • Рус Тат
  • Милли йолаларыбыз. Нәүрүз килде, яз килде!

    Март аен юкка гына шарт ае дип йөртмәгәннәр. Кояш нурлары кар көртләреннән челтәр үреп, урамнарда гөрләвекләр агуга карамастан, кыш хакимлегеннән баш тартырга җыенмый, юк-юкта буранлап, үзенең кырыс холкын күрсәтеп ала. 18 мартта шәһәребездә Нәүрүз бәйрәмен үткәргәндә дә ябалак-ябалак кар яуды. Әмма аңа карап бәйрәмнең һич яме китмәде. - Бүген, күрәсез,...

    Март аен юкка гына шарт ае дип йөртмәгәннәр. Кояш нурлары кар көртләреннән челтәр үреп, урамнарда гөрләвекләр агуга карамастан, кыш хакимлегеннән баш тартырга җыенмый, юк-юкта буранлап, үзенең кырыс холкын күрсәтеп ала. 18 мартта шәһәребездә Нәүрүз бәйрәмен үткәргәндә дә ябалак-ябалак кар яуды. Әмма аңа карап бәйрәмнең һич яме китмәде.

    - Бүген, күрәсез, ипи яуган көнне кышны озатып, язны каршылыйбыз. Дөньяларыбыз имин, табыннарыбыз мул, тәннәребез сихәт булсын. Алдыбызда зур бурыч - чәчү тора. Авыл хуҗалыклары кырга төшәргә тулысынча әзер дип әйтергә була. Аны уңышлы төгәлләп, Сабантуйларында шулай матур итеп очрашырга язсын, - дип район башлыгы урынбасары Наҗәт Нәгыймов халыкны бәйрәм белән тәбрикләде.

    Мәдәният йорты мәйданында сәнгатькәрләребезнең җыр-моңнары агылды, татар халык биюләре башкарылды. Өлкәннәр дә, нәни балалар да аларга кушылып җырлады, биеде, рәхәтләнеп күңел ачты. Ә мәктәп туклауны комбинаты һәркемне карга боткасы һәм кайнар чәй белән сыйлады.

    - Без яшь чакта бәйрәмнәр бу кадәр дә күңелле узмый кебек иде. Бигрәк матур әзерләгәннәр. Оҗмах бит! - дип хис-тойгылары белән уртаклашты Нәҗибә апа Нуретдинова.

    Яшь ярымлык улы белән бергә тамаша кылучы Гүзәл Гыйльфанова да шәһәрдәге чараларга яратып йөри икән.

    - «Нәүрүз» - үзгә бәйрәм ул. Без халкыбызның милли гореф-гадәтләрен, йолаларын белеп үсәргә, туган телебез, туган җиребез белән горурланырга тиеш, - ди ул.

    Бәйрәмнең йөзек кашы - ел да үткәрелә торган "Нәүрүз гүзәле" бәйгесен дә тамашачылар яратып карады. Җиде авылдан җиде гүзәл үзләренең осталыкларын, уңганлыкларын күрсәттеләр.

    - Кызларның барысы да нык әзерләнеп килгәннәр, җиңүчене билгеләве бик авыр булды, - ди жюри рәисе, район Советы аппараты җитәкчесе Айдар Хәлиуллин..

    Быел "Нәүрүз гүзәле" титулына Әгерҗедән Альбина Хәбибуллина лаек булды.

    - Бу бәйгедә икенче елымны катнашам. Былтыр "Иң уңган Нәүрүз гүзәле" исеме бирелгән иде. Үзем Алабуга педагогия институтында 2 нче курста укыйм. Киләчәктә химия-биология укытучысы булып, районга эшкә кайтасым килә, - ди Альбина.

    Әйтерсең, Нәүрүз килгәнне генә көткән, бәйрәмнән соң кар-буран туктап, кояш чыкты. Ел фасыллары тулпарының дилбегәсе Яз кулына күчте.

    Резеда ШӘРИПОВА

    Бәйрәмнән күренешләр белән aznakaevo-rt.ru сайтында фотогалереяда таныша аласыз

    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Реклама
    Комментарии (0)
    Осталось символов: