Азнакайдан Миләүшә Миңнегулова армрестлинг буенча ярышларында беренчелекне яулаган

Азнакай районының Мәндәй авылында туып үскән Миләүшә Миңнегулова быел март аенда Казанда узган кул көрәше буенча ярышларда үз авырлыгында берече урынга чыкты.

- Армрестлинг белән кечкенәдән үк шөгыльләнәм, - ди Чуар-Абдул авылы мәктәбендә укыганда ук тренеры Миндияр Латыйпов җитәкчелегендә район, республика ярышларында катнашып, җиңүләр яулаган Миләүшә. - Хәзерге көндә мин мехмат студенты. Беренче курстан ук университетның кул көрәше буенча тупланма командасы составына кердем, призлы урыннар яуладым, - ди Мәндәй кызы.

Казан студентлары арасында узган ярышларда беренчелекне алу Миләүшәгә армрестлинг буенча Россия вузлары Чемпионатына юл ачкан: ул апрель аенда Белгородта 46 югары уку йотрыннан 160 спортчы арасыннан дүртенче урынны яулады.