Азнакайда – Хәтер көне (ФОТО+ВИДЕО)

Совет гаскәрләре өчен әфган сугышы тугыз елдан артык дәвам итте. Бу сугышта безнең районнан 254 егет катнашты, аларның 52се хөкүмәтнең югары бүләкләренә – орден-медальләргә лаек булды, якташыбыз Ильяс Даудига Россия Герое исеме бирелде. 6 егетебез интернациональ бурычын үтәп батырларча һәлак булды. Әфган сугышы яралары төзәлергә дә өлгермәде, чечен җирендә хәрби хәрәкәтләр башланды. Төньяк Кавказдагы бу бәрелешләрдә районыбызның 300 дән артык ир-егете катнашты. Чечен сугышы янә 4 гаиләгә улларын югалту кайгысын алып килде.

– Вакыт яраларны төзәтә, дисәләр дә, улларын югалту ачысын кичергән әти-әниләрнең, якыннарының йөрәк ярасы беркайчан да бетә торган түгел. Әнә шундый лачын егетләр үстергән райондашларыбыз алдында баш иеп, бүген без аларга, ә инде бу афәттән исән-имин туган якларга кайтып, җирлегебезнең төрле өлкәләрендә хезмәт куйган, хәзер инде оныклар үстергән әфган сугышы һәм башка хәрби хәрәкәтләр ветераннарына рәхмәт сүзләребезне, изге теләкләребезне җиткерәбез, – диде тантанада чыгыш ясап район башлыгы Марсель Шәйдуллин. – Алар кылган батырлыклар күңелләребездән беркайчан да җуелмас.