Яңа уку елына – яңартылган мәктәп

ТР Президентының мәктәпләрдә капиталь ремонт программасына кергән Азнакай 5 нче урта мәктәбендә эшләр тулы көченә бара.
Резеда Шәрипова
Биредә инде тәрәзәләр алыштырылган, тышкы ишекләр куелган, бәдрәфләргә кафель ябыштырыла, сантехника, җылылык системасы яңартыла. Ремонт ашханәгә дә кагылачак. Әлбәттә, башкарасы эшләр әлегә җитәрлек.
- 15 августка ремонтны төгәлләргә тырышачакбыз, - дип ышандырды подрядчы оешма - "Полимерстрой" ҖЧҖ мастер-прорабы Илдар Сәмәрканов.
Аларның эшен мәктәпнең ата-аналар комитеты күзәтүдә тота. Моның өчен махсус комиссия төзелгән.
-Бинабызга - 43 ел. Бар нәрсә дә искергән иде. Иң беренчеләрдән булып Президент программасына керүебезгә шатбыз, - ди мәктәп директоры Миләүшә Сабитова.
Инде хәбәр итүебезчә, капремонт Зур Сукаеш һәм Актүбәнең 1 нче мәктәпләрендә дә бара.
Мәгариф идарәсе җитәкчесе урынбасары Эльвира Зарипова киләсе елга да капиталь ремонт программасына кертү өчен мәктәпләр исемлеге төзелүе хакында әйтте.