Бүген Азнакайда Халыкара тәмәкесез көн буларак билгеләп үтелә

Белгечләр үпкә рагының - 90, хроник бронхитның - 75 һәм йөрәк өянәгенең 25 процентында чирнең үлем белән тәмамланган очракларга тәмәке тарту сәбәпче булуын әйтә. Россиядә ир-атларның - 65, ә хатын-кызларның 30 проценты тәмәке тарта. Болар - гомерләрен үз теләкләре белән 10-15 елга кыскартучылар.
Ел саен 31 май Халыкара тәмәкесез көн буларак билгеләп үтелә. Шул уңайдан райныбызда сәламәт яшәү рәвешен пропагандалау һәм тәмәкегә каршы закон таләпләрен халыкка җиткерү буенча профилактик чаралар оештырыла. Кичә яшьләр идарәсе волонтерлар белән берлектә шәһәребез урамнарында тәмәкенең зарары хакында аңлатып, сәламәт яшәүгә чакырып, акция үткәрделәр.