Азнакайның ветераннары бик актив тормышта яши

Районыбыз ветераннары бик актив тормышта яши. Ветераннар советы рәисе Миргасим Кәримов үзе дә тынгысыз, башкаларны да тик кенә өйдә яткырмый, әледән-әле чаралар оештырып, аларны кызыклы очрашуларга тартып кына тора.

Узга атнада ветераннарыбыз үзләренең яшьлек эзләре калган таныш сукмаклардан "Восток" күңел ачу үзәгенә юл тотты. Биредә алар шәһәребезнең тагын бер уңайлы, күркәм ял үзәге белән танышты, бер-берләренең хәл-әхвәлен белешеп иркенләп гап куерттылар. Өлкәннәребез өчен ял мизгелләре бүләк итеп "Летят журавли" фильмын куйдылар. Ветераннар кинозалдан зур тәэсирләр алып, яшьлекләре хатирәләрен яңартып чыкты. Менә шундый мәгънәле, эчтәлекле, тәрбияви фильмнарны яшьләргә дә тәкъдим итәргә кирәк, дигән фикерләрен белдерделәр.