Азнакайда 2 кешене елан чаккан

Җәйнең үз хәвеф-хәтәрле яклары бар. Республикабыз сулыкларында ел башыннан 15 кеше батып үлгән, аларның 2се балалар булуы тагын да аяныч.

Шөкер, безнең районда мондый фаҗигаләр әлегәчә теркәлмәде һәм алар булмасын да иде. Узган елларда җиләккә баручыларны елан чагуын онытмыйк.

Быел да андый очраклар булган. Медицина ярдәме сорап мөрәҗәгать иткән 2 азнакайлыга елан агуына каршы сыворотка ясалган. 20 кеше талпан кадалу очрагы теркәлгән.

Талпан медицина билгеләмәсе буенча аеруча нәзберек урыннарга, балаларга кадалганда, энцефалитка каршы иммуноглобулин ясау мәҗбүри итеп куела. Хәвеф-хәтәрләрдән сакланыйк, игътибарлы булыйк!