Азнакайда 1 сентябрьдән штрафлар арта

Административ хокук бозулар турындагы Россия Федерациясе кодексына үзгәрешләр кертелү сәбәпле, 1 сентябрьдән юлда йөрү кагыйдәләрен бозган өчен штрафлар артачак.

Иң каты җәза исерек килеш руль артына утыручыларга. Бүген эчкән килеш машина йөртүчеләргә ел ярымнан ике елга кадәр автомобиль белән идарә итүдән мәхрүм ителү яный. Ә 1 сентябрьдән андыйларның машина йөртү таныклыгын гына алып калмаячаклар, бюджет файдасына 30 мең сум күләмендә штраф та түләттерәчәкләр. Кагыйдә бозу кабатланса, штраф күләме 50 мең сум тәшкил итәчәк, машина йөртү таныклыгы 3 елга алыначак. Үз автомобиль руле артына эчкән кешене утыртучыны да шушындый ук җаваплылык көтә.

Медицина тикшерүеннән баш тартсаң, штраф - 30 мең сум, таныклык белән дә 1,5-2 елга саубуллашасың. Транспорт чарасын идарә итү хокукы таныклыгын алдырткан кеше исереклеккә (руль артында вакытта) медицина тикшерүеннән баш тартса, 10-15 тәүлеккә кулга алынырга мөмкин.

Хәвефсезлек каешын эләктермәгәндә икеләтә, бүгенге 500 сум урынына, зуррак сумма - 1000 сум түләргә туры киләчәк. Балаларны машинада махсус креслосыз йөртү 3000 сумга төшәчәк. Моңа кадәр автомобиль белән идарә иткәндә кесә телефоны белән сөйләшүчегә 300 сум штраф салынган булса, 1 сентябрьдән кагыйдә бозу турындагы беркетмәне 1500 сумга тутырачаклар.

Юлда тизлек режимын саклау мөһим кагыйдә булып кала. Тизлекне нормадан сәгатенә 20 километрга арттыручылар 300 урына 500 сум, ә 80 километрдан да күбәйсә, 5 мең сум штраф түләячәкләр яисә 6 айга йөртүче машина йөртү таныклыгыннан мәхрүм ителәчәкләр.

Юл хәрәкәте кагыйдәләрен үтәмәүче җәяүлеләргә, мопед (скутер) йөртүчеләргә 1 сентябрьдән штрафлар күләме шулай ук шактыйга арта.