Азнакай шәһәр судында – яңа рәис

Чарада Татарстан Югары суды, суд департаменты идарәсе вәкилләре, район башлыгы Марсель Шәйдуллин, федераль һәм иҗтимагый судьялар, суд аппараты хезмәткәрләре, җирлегебезнең хокук сагы органнары җитәкчеләре һәм вәкилләре катнаштылар.

Татарстан Югары суды рәисе урынбасары Айдар Галиәкбаров әүвәл сүзне коллективны 6 ел җитәкләгән, шушы дәвердә аны республикада иң яхшы суд исемен алу дәрәҗәсенә җиткергән, аны халыкка ачык итүдә республикакүләм тәҗрибә базасына әйләндергән, үзе дә “Иң яхшы судья” исемен йөрткән, 27 ел судьялык стажына ия Йосыф Җәмил улы Сәхаповка тирән рәхмәтләрен җиткерүдән башлады. Коллегалары да аңа югары профессиональлеге белән олы үрнәк булуын ассызыклап, ихластан рәхмәтләрен белдерделәр. Коллективны һәм үзара хезмәттәшлек ведомстволары вәкилләрен яңа җитәкче белән таныштырып, башкала кунаклары, район башлыгы Марсель Шәйдуллин аңа Азнакай шәһәр суды алган биеклекне саклап, тагын да уңышлар яулап, уңышлы һәм имин эшчәнлек теләделәр.

Илдар Шәрифуллин әлегә кадәр Ютазы районы 1 нче суд участогында иҗтимагый судья, аннары Ютазы район суды рәисе булып эшләгән. Җавап сүзендә ул үзенә күрсәтелгән ышаныч өчен рәхмәтен белдереп, аны акларга, судның бай тарихын, традицияләрен саклауда, азнакайлыларның хокукларын яклау һәм мәнфәгатьләрен кайгыртуда бар белемен, көчен куячагын җиткерде.